علشان أبقي صريح معاكم كدة من الآول انا لحد دلوقتي مش عارف هختار مين رئيس ولان أحساسي أن دي مسئولية أكبر من مسئولية اختيار عضو مجلس الشعب لاني الرئيس المعروف أنه رأس الأمر كله واحنا معندناش لسه موضوع البرلمانية ده ومش هنحب أن يكون رئيسنا برتوكولي يعني شكل كدة وملوش دور وده محدش هيرضاه والدستور اللي جاي اكيد هيخلي للرئيس صلاحيات وهتبقي صلاحيات مهمة وكبيرة كمان فعلشان كدة الاختيار مسئولية
ولان النظام البائد ربنا ما يعيده ثاني خلانا منعرفش غير مبارك وابنه ولروحنا لغيرهم هنلاقي نفسينا ما بين عمرو سليمان وعمرو موسي وكانت فرصتهم منعدمة علشان كدة كنا بنرجع بسرعة لاب وابنه ثاني ونختار ما بينهم وفي احيان كثير كنا بنقول دول احسن أهم شبعوا يعني مش هيسروقونا ثاني يعني كنا عارفين انهم حرامية بس برضه كنا هنختارهم لانهم شبعوا حتي لما ذاعوا علينا مسلسل بتاع الملك فاروق قلنا ماهي الملكية حلوة اهي ياجماعة والناس كانت بتحب الملك مكنتش بتكره وانقلاب الضباط الأحرار عليه ظلمه ومحدش يقولي ثورة دي كان انقلاب الثورة اللي بجد هيا اللي احنا عايشنها ولسة منجحتش دي ...
أرجع لموضوعي من ثاني الناس اللي اتقدمت دي كلها للترشح للانتخابات الرئاسة مشكلتها واحدة وهيا اننا خايفين نرمي حمولنا علي حد فيهم وفي الاخر يطلع أونطة وهيا مش ناقصة البلد حالها حال والأمور مش مستحملة ونفسنا في واحد يكون ذكر راجل بجد .... ويكون قادر علي انه يلم الناس حوليه مش يفرقهم يعني يكون اسلامي يلم الأسلامين ويكون ليبرالي يلم الليبراليين ويكون عسكري يلم العسكريين .. وطبعا ده مش موجود في ولا واحد من اللي ترشحه لحد دلوقتي وشكله كدة مش هيكون واللي موجود يا ليبرالي والاسلامين مش رافضينه اوي أو اسلامي والليبراليين معندهمش اعتراض عليه او عسكري والبايدة تستاهله اكثر من قصر القبة .
وفكرة التوافق اللي تكون ذي بتاعت اليمن دي اكيد محدش هيرضي بيها يعني ان احنا ننزل الانتخابات نلاقيها استفتاء بنعم أو لا ... ده مرفوض نهائيا ومتهيئليش إن حد غيري هيقبله اصلا .. لكن فكرة الاعلان عن الرئيس مرضي عنه من الطوائف المختلفة ده اكيد هيكون أفضل حل في نظري للقضية وهيريحنا في الاختيار جدا .... لكن المهم ان يكون مش طرطور يعني راجل برضه مش معني انه جاي برضا ودعم القوي السياسية انه ما يلقش لحد فيهم لا وما يوقفش لصالح الناس الغلابة ولان دي الحقيقة المرة فمفيش راجل بجد يقدر يجي بدعم القوي السياسة وفي الاخر يقولهم لا ده عمليا صعب ..يبقي فكرة التوافق هتبقي منقوصة ومش هتنفع .
فكان لازم باقة افلتر المرشيحين وعملت كدة فعلا وقلت لصحابي عليه وعجبهم الفكرة دي فاحنا ما بين المنافقين ( فلول - عسكريين ) وما بين الجبناء بلا مواقف نضالية وما بين اصحاب المواقف المشرفة .
فالكل اصحاب برامج والكل فكره باقة ثوري وبيحب الشباب وبيكره اسرائيل وبيرفض المعونة وضد المعاهدة وحساس بالغلابة واي كلام يريح الناس هتلاقي بيتقال
يعني البرامج ما تنفعش لوحدها تكون عامل لاختيار رئيس فحسني مبارك نفسه كان عنده برنامج لو تنفذ صح كانت مصر باقت حاجة ثانية الكلام ما فيش اسهل منه .... وعلي رأي المثل اسمع كلامك اصدقك أشوف أمورك استعجب ...
و المذهب الفكري برضه عمره ما هيكون عامل لاختيار رئيس فاليبرالين مختلفين بينهم وبين بعض والاسلامين برضه مختلفين ما بينهم وبين بعض والاشتراكيين وهلما جرا وزي ما بيقولوا مصارين البطن ببتعارك يعني ما ينفعش اختار واحد لانه اسلامي فممكن يكون اسلامي عنده غير اسلامي عندي أو انه ليبرالي فممكن ليبراليته غير ليبرالييتي وهكذا ....
في نظري انا باقة التاريخ والموقف الثابت هو اللي لازم يكون اساس اختيارنا لانه لو تاريخ مشرف يعني كان بيقول كلمة الحق قبل ثورة ولا زال وموقفه ثابت وماكنش ضد الثورة ده في نظري هييعني انه صادق واللي بيقول عليه دلوقتي اكيد هيحاول ينفذه ولو مقدرش مش هيتستني نلومه وهيقول ياجماعة الاسباب اللي مخلتهوش ينفذه .
انا بدور علي التاريخ والموقف الثابت في اختياري للرئيس ولحد دلوقتي انا مش لاقي غير حازم صلاح أبو إسماعيل وعبد المنعم أبو الفتوح وحمدين صباحي علشان اختار ما بينهم يمكن بكرة يزيدوا واحد أو اثنين لكن اختياري مش هيكون إلا علي أساس التاريخ والموقف الثابت لا بفكر ولا برنامج أو أن الفكر والبرنامج هيكون نمرة اثنين وثلاثة بعد التاريخ والموقف الثابت
اتمني أن يكون الكلام ده مفيد ليكم في اختيارتكم والله المستعان ..
0 تعليقات:
إرسال تعليق